Tra di noi - Petru Guelfucci

Passata hè più d’una stonda

Corse le nove senza aretta

U mondu và di a so ronda

È tempu vene à chì l’aspetta

Po sò venute tante chjame

Da u vicinu è u landanu

Sempr'à imbellisce e mio brame

Sott'à un celu paisanu

È cum'è l’acque muntagnole

Chì vanu à rinfrescà u sole

Ne vengu oghje à u calore

Ch’ellu mi manda u vostru core

È si da voi era aspettatu

Ti vogliu dì mi sì mancatu

È si da voi era chjamatu

Ti vogliu dì nunda hà cambiatu

Noi sapemu chì a vita

Si ne scola cum’un veranu

U tempu strigne à temp’avvita

Cù chjavi chè n’avemu in manu

Allora quandi u chjassolu

A ci canta in versu ribellu

Fussi chè per un passu solu

Si ne scappa più d’un zitellu

Ma di vultà par'è listessu

Sol'à lu veru l’hè cuncessu

U nostru silenziu era intesu

À fil di cantu sempre tesu

È si da voi era aspettatu

Ti vogliu dì mi sì mancatu

È si da voi era chjamatu

Ti vogliu dì nunda hà cambiatu

Ci basta una melodia

Cù duie note è qualchì rima

Pè discitanne l’alegria

È ritruvacci più chè prima

Di ritruvassi pè cunvene

Quantu lu cant'à nodi ci lea

Ma pè dà sempre cappiu lene

À ogni sonniu è ogni idea